«Բավարիայի» պաշտպան Դանտեն կարծում է, որ ինքն ու իր թիմակիցներն իրենց թույլ են տվել՝ որոշակիորեն թուլացնել զգոնությունն ու հանգստանալ, հայտնում է «football.ua»-ը։

Մյունխենյան գրանդը հեշտորեն է անցել Գերմանիայի չեմպիոնության ուղին՝ դրա ավարտից մի քանի տուր առաջ հռչակվելով Բունդեսլիգայի ընթացիկ խաղարկության հաղթող։ Հենց այս գործոնն է, ըստ «Բավարիայի» բրազիլացի խաղացողի, ազդել Չեմպիոնների լիգայի քառորդ եզրափակչի՝ «Մանչեսթեր Յունայթեդի» հետ խաղի արդյունքի վրա (1։1)։

«Ամեն ինչ մի փոքր դժվարացել է այն բանից հետո, ինչ դարձանք Գերմանիայի չեմպիոն։ Սակայն, կարծում եմ, այժմ վերադառնում ենք մեր բնականոն մարզավիճակին»,-նշել է «Բավարիայի» պաշտպանը։

«Չնայած տիտղոսին, Բունդեսլիգայում մտադիր չենք կանգ առնել ձեռք բերածի վրա։ Անհրաժեշտ է պատշաճ մակարդակի խաղ անցկացնել «Աուգսբուրգի» դեմ, ինչը կօգնի մեզ՝ պատրաստվելու «Մանչեսթեր Յունայթեդի» հետ կայանալիք պատասխան մրցավեճին»,-շեշտել է Չեմպիոնների լիգայի գործող չեմպիոնների և Բրազիլիայի հավաքականի ֆուտբոլիստ Դանտեն։